John 18

Ala Yesu Wan

1Esa nu Yesu ɓo la pwo aɓeda ye daɓo, wa pi Kidron nuwan ya, ɓedo n wo abara yi, ɓa lo fi n ofwa ho ɓo. 2Yahuda, nwo ɓo kun Yesu nyi, wo ɓei kpe abahi aba, ntu ge Yesu ɓei zhin woi lo ɓo cici nwo abara yi.

3A malami dnagmayi ɓedo a Farisiyi, ɓa ku asoja ga ɓa gni lo n Yahuda yi. Ɓa lo n na fitila yi, n anabwi-yi, n nanyagalayi ɓa lo ofwahi.

4Shi Yesu ɓo ku kpe ɓoye nkwo ɓa zhin wo, wa gmi lo wa nya ɓa ɓo ge, “Fye ye nyika na?” 5Ɓa ci wo ge, “Yesu” wa gna ɓa ge, Omi nu zhin wo. (Yahuda zabwi za ɓo gni ngnisun nɓai). 6She wo ɓo gna ɓa ge, “Omi nu zhin wo,” ɓa ce ɓa miya zhi nkni navun yi gbudu-gbudu.

7Wa je ɓa ɓo nya ge, “fye ye nyika?” Ɓa ci ge, “Yesu n wo gmi n Nazarati nyi.”

8Yesu wagna ɓa ge, “Mi ku gna fye ge omi nu gni nyi,” shi fye bwa mi nu ye nyi, fye fwa aza deye ɓa lo ɓa nya. 9Wo ɓo da deye, nabai owo i ɓeda kwa nu nu ge, “Aza nha ga mi nyi, kwo gmanyi kwo to bwi m.”

10Bitrus wa wa obe-yakwo, wa ka Malkus tnubua bwai-zhe-nya ya n i cei. Wo ɓo zhin malami dnagmanyi fyenu nu.

11Yesu wa gna Bitrus ge, “La ho beyakwo ya dna n kwo apui. Kwo to zhin tile nu ma sin wahala n Dada la ga mi nyin?”

12Elo nu, abusi-ɓiyida, nna sojayi nɓa tukwoda yi, ɓa wan Yesu ɓa pa wo nna wun yi. 13Ɓa lo n woi n Hannana aba, Kayafas yezhi nwo nu ɓo zhin malami dnagmayi dna eyehi. 14Kayafa nu ɓo gna a Yahudiyi atukwoda ge, “Kwo bmiya lo zaknayi wa fi ntu azaje ɓo.” 15Siman Bitrus wa vi lo n navun, ngnisun n bara dohoyi. Barahi ɓei dami n malami dnagmayihi, ntu ce nu a fwa wo wa lo dna ngnisun n Yesu yi n awada ʼba. 16Ama Bitrus da wa kpegni n nabokunmi gbe. Bara dehi wa gmi lo, wa da ɓo n ɓinyikwoi bokunmi-guyi ge wo du ɓe n Bitrus yi. 17Binyikwoihi wa nya Bitrus ge, “ho to zhin Yesu bara nu m?” Bitrus wa ci ge, “Awo, mi to zhin kwo num.”

18Ese ɓeifu, ntu ce nu, aza ɓo zhi ɓai wye ona, a fyenu ɓedo a sojayi. Bitrus wa kpe gni n kunsun n ɓai woi wye ona.

19Malami dnagmayi, wa ya Yesu aɓo nya, tu nwo abara tukwo ɓedo nwo nyawu yi.

20Yesu wa dna ɓegbe wa ci ge, “Aza kpe mi nyawu ɓeye lo vinya, Ma ku waʼazi zhin dna nna duwa-nyakun, a Yahudiyi atukwoda ɓai wo. Mi to wu nyaho n vim, ma wu kwo pei-pei nu. 21Ntu kniɓeyi hoi nya mi ɓo a? Nya aza ɓo nɓa ɓo wo mi nyi. Ba kpe ɓeye lo n mi ɓo da.”

22Shi Yesu ɓo zo ɓeda lo nu, soja ho wa ce wo pmi, wa nya wo ge, “Beda pya nu nho ɓa dna Malami Dnagmayi ɓegbe ncei?”

23Yesu wa ci ge, ngye mi ta da gaiciya nu m, ha da ma wo, ama ngye mi da gaiciya nu, knidonu ɓa zhin ha ce mi pmi a?

24Hannana wa tnu n Yesu yi n Kayafa aba n pa-pa-yi, wo nu nwo ɓo zhin Malami dnagmayi nyi.

25Siman Bitrus woi gni woi wye ʼna, Zaho wa nya wo ɓo njesun ge, “Ho to zhin zahi bara nu m? Wa ci ge, Awo.”

26Ama Malami Dnagmayi fyenu ho wa nya wo ɓo ge, “Mi to ɓo ku gye ho, n kunsun Yesu yi dna n fwa n?” Fyenu hi ɓa ɓei zhin ʼbye nu n zahi n Bitrus ɓo ka wo tnubua ya nyi.

27Bitrus wa aɓo na njesun, Nsa-sayi pise-nugba kwa ce ku.

Ala Lo N Yesu Yi N Bilatus A ba

28Kayafa ɓo pwo Yesu owa da ɓo n labmiyi nu. Ɓa la wo ɓa lo nwoi n a Romayi gwamna garko. A Yahudiyi nɓa ɓo lo Yesu yi nyi, to ɓa ye ge ɓa lo fi n garko-him, ge kada ɓa tu cegye to ɓa mi ɓa gyi Paska nyagyi m. 29Bilatus wa gmi ɓe, wa nya ɓa ge, “Oza deye, wa zhin fye knihi na?”

30Ɓa ci ge, “Wo to ɓein laifi ye lon, to yo wan wo ɓe cei nho aba m.”

31Bilatus wa gna ɓa ge, “fye da wo owa nfyehin yi.” A Yahudiyi ɓa ci ge, yi ta mi ya wu oza m, yi ye ha ga yi ʼgbe. 32Deye ɓo zhin lo nu, ntu ge Yesu ɓeda kwa nu nu, esa nwo ɓo da efi pya cei nwo ɓa fi nyi.

33Bilatus wa jeze lo wada-bokun, Wa gna ge aduɓe n Yesu yi, wa nya wo ge “ho nu zhin a Yahudiyi osu?”

34Yesu wa nya wo ge, “ho nu nya ɓeye nhohin tukwo ko aza na gna ho a?”

35Bilatus wa ci ge, Ho gye ge mi zhin Yahudiyi-za nu? Oho aza nu na ɓe nhoi, ɓedo nna malami dnagmayi. Ha zhin ɓa kni a?

36Yesu wa ci ge, “Mi to zhin esu anyi nya nu n. Mi ɓo zhin esu anyi ye nya nu omi aviyi ɓo sunkun ga mi, esa nu a Yahudiyi ɓo wan mi nyi.”

37Bilatus wa nya wo ge, “Ho zhin Esu nu?” Yesu wagna wo ge, “E, ntu ce nu a ma mi. Ma ɓe ntu ge ma wu gaiciya. Minu zhin gaiciya, aza nɓa da gaiciya ɓa nu zhin omi aviyi.”

38Bilatus wa nya ge “Knidonu zhin gaiciya?” Wa gmiya lo bmi da a Yahudiyi wa gna ɓa ge, “Mi to bwa laifi ho nwo abam.” 39Kwo zhin fye kun-nu, ma gmi oza gmanyi ya ga fye n kurkuku n Paska sayi. Fye ye lo ma lo a Yahudiyi esu ya ga fye? 40Ɓa kni aku, “ɓai gna ge, awo a ga yi Barabbas nu.” Barabbas hi ɓeizhin evi nu n zaje yi.